'Cop killer' nadakpan

CEBU, Philippines - Suspetsado pagpatay sa usa ka polis nadakpan sa miaging hapon diha sa barangay Lahod lungsod sa Barili human sa pagtago-tago og kapin duha ka tuig human sa krimen.

Ang maong suspetsado nailhan nga si Carlos Miñoza nga maoy gitumbok nga mipatay kang PO3 Telesforo Hotillano niadtong Enero 2008 diha sa sitio Mahayahay barangay Mabolo ning dakbayan nga diin maayong pagkapusa sa ulo sa naulahi human dakdaki og bato sa suspek.

Ang mga sakop sa City Anti Illegal Drugs Special Operations Task Group (CAIDSOTG) ug Cebu City Police Auxiliary Group (CCPAG) mi-serve sa warrant of arrest nga kasong murder nga giluwatan ni Branch 12 Presiding Judge Silvestre Maamo Jr. batok kang Miñoza.

Nasuta nga gidakdakan og bato ang ulo sa pulis gumikan sa nakitang gibana-banang napulo ka kilong bato diha duol sa patay’ng lawas niini nga namilit pa ang buhok sa pulis.

Atol sa imbestigasyon, gikatahong hubog ang biktima niadtong tungura maong wala kini makapanalipod sa kaugalingon.

Ang maong polis niadtong mga panahona gikatahong daghang nakontra sa maong dapit lakip na mga silingan niini, gani makadaghan na kining maalarma kaniadto sa mga sakop sa Mobile Patrol ug Mabolo Police Station tungod kay magpabuto sa iyang armas.

Makaduha na usab ma-demote ang maong polis tungod sa mga reklamong gipasaka batok kaniya. Ang mga imbestigador sa Homicide Section nagpakitang personal nga panagbingkil ang hinungdan o motibo sa pagpatay sa maong polis. (BANAT NEWS)