CEBU, Philippines - Nalandig sa tambalanan ang 27-anyos nga apprentice sa barko human kini pusila sa wala hiilhing lalaki nga nagsakay og pump boat sa sulod sa Trigon Shipyard sa sitio Suba, barangay Sangat, lungsod sa San Fernando kagahapon sa kaadlawon.
Ang biktima giila sa mga polis nga si Armando Ecla Jr., apprentice sa M/V Kathrine nga nagpundo diha sa maong ship yard, lumad nga taga North Cotabato.
Si PO3 Marjukin Misuari, duty desk officer sa San Fernando Police Station nga nahinabi sa Banat News kagahapon mibutyag nga sayo niini, si Ecla didto sa sulod sa barko nga nag-atiman sa iyang trabahoon.
Dihang may usa ka wala hiilhing lalaki nga nagsakay og pump boat mituyo og paduol sa barko ug dihang nakita si Ecla kalit kining gipusil.
Matud ni Misuari nga human sa pagpamusil dali usab nga mibiya sa lugar ang nahisgutang lalaki.
Ang biktima kinsa naigo sa lawas, gihatod dayon ngadto sa Carcar District Hospital.
Samtang ang hepe sa San Fernando Police Station nga si Senior Inspector Jaime Santillan nagkanayon nga wala pa silay nahipos nga impormasyon sa motibo sa pagpamusil ug nagpahigayon pa sila og follow-up nga imbestigasyon niini. (BANATNEWS)