Greg mokiha gyud ni Gwen

CEBU, Philippines - Mopasaka gyud og kaso sa korte si Bise Gobernador Gregorio Sanchez Jr. batok kang Gobernador Gwendolyn Garcia gumikan sa giingong pagsapaw ug pagpanghilabot sa gobernadora sa gimbuhaton sa Hunta Probinsyal pinaagi sa pagpakigtagbo ug pagbuot alang sa committee chairmanship.

Dungan niini, si Sanchez miapelar sa mga sakop sa Hunta Probinsiyal nga ipatigbabaw ang demokrasya sa lehislatura sa Sugbo nga dili angayan diktahan sa gobernadora.

Giinsister ni Sanchez nga si Garcia maoy nagbuot pagpanghatag og committee chairmanship sa mga karaan ug bag-ong napili nga bokal atol sa gipatawag nga tigum niini didto sa Marco Polo.

Hinoon, si Bokal Agnes Magpale midepensa kang Garcia pinaagi sa pag-ingon nga igo lang nakigtagbo nila ang gobernadora ug wala manghilabot o magbuot sa mga komitiba.

Apan matud ni Sanchez nga normal lang sa mga bokal nga modepensa sa gobernadora tungod kay kadaghanan nila mga sakop man sa One Cebu Party sa gobernadora. Giawhag hinuon ni Sanchez ang mga bokal pagsulti sa matuod. Gani gihimong basehanan ni Sanchez si board member-elect Arleigh Sitoy nga una nang miduol kaniya nga nagtinguha nga maoy makahupot sa Committee on Environment, apan pagkahuman sa tigum nga gipatawag ni Garcia nausab na ang iyang baruganan tungod kay ang Committee on Arts and Culture maoy gihatag kaniya. (BANATNEWS)