Oaminal: Drugas sa VisMin puhagon

CEBU, Philippines - Nangante si kanhi Dangerous Drugs Board (DDB) Undersecretary Paul Clarence Oaminal nga himuon niyang prayoridad ang paghingusog sa kampanya pagsumpo sa suliran sa gidiling drugas dinhi sa Visayas ug Mindanao sa higayon nga mabalik siya sa katungdanan.

Nunot niini, gihangop usab ni Oaminal ang wala ug tuo nga mga suporta nga iyang nadawat pagtuboy niya aron mabalik sa katungdanan human matagbaw sa gipakita niyang labok sa dihang nagsilbing DDB vice chairman ug acting vice chairman.

Gawas kang outgoing mayor ug congressman-elect Tomas Osmeña ug Atty. Democrito Barcenas, ang presidente sa Noy-Mar Movement dinhi sa Central Visayas, gatusan usab ka mga ordinaryong kawani sa gobyerno mituboy kang Oaminal pinaagi sa Facebook ngadto sa administrasyon ni president-apparent Benigno Simeon “Noynoy” Aquino III.

Ang fan page nga gipadangat sa facebook nga nagtuboy kang Oaminal pagbalik sa posisyon gi-ulohan kini og “Ibalik Si Usec Paul Oaminal sa Puwesto.”

Gipasalig usab ni Oaminal nga lain niyang hatagan og pagtagad kun mahatagan og kahigayonang mabalik sa puwesto mao ang pagpatuman sa programa nga napasagdan ug wala ma-followup pag-release sa P15 milyones nga gahin alang sa gisugyot ni Arsobispo Ricardo Cardinal Vidal pagbutang og drug rehabilitation center sa Sugbo ingon man ang expansion sa Alternative Development Program sa mga marijuana farmers aron magtinarong na kini sa pagpanguma.

Ang mga mag-uuma nga gipaabot nga makabenepisyo niini, matud ni Oaminal, maggikan sa bukirang bahin sa dakbayan sa Sugbo, Toledo, Danao, Alcoy, Badian ug Dalaguete. Hinoon si Oaminal gipatawag ug nakigkita na sa bag-ong napili og balik pagka-Senador Vicente Sotto III niadtong Martes didto sa Manila ug gitanyagan kini nga ibalik sa puwesto human sa pag-asumer unya sa bag-ong presidente karung Hunyo, 30, 2010.

Giawhag usab niya ang bag-ong pamunoan pagsulbad sa problema sa ginadiling drugas.

Matud pa ni Oaminal nga angayang unahon sa pagsumpo sa gobyerno ang sindikato sa ilegal nga drugas kay sa korupsyon sa gobyerno sa nasud tungod kay daghang pamilya ang apektado gumikan sa ginadiling drugas.  (BANATNEWS)