CEBU, Philippines - Gituohang gipanimaslan sa iyang mga nabiktima ang gipasanginlang notadong kawatan kansang patay’ng lawas nakaplagan ug dunay samad pinusilan sentro sa agtang ug nagbuy-od sud sa iyang gihigdaang payag sa sitio Katura, barangay Buagsong lungsod sa Cordova kagahapon sa alas 6:45 sa buntag.
Ang biktima mao si Julius Alarcio, molupyo sa barangay Bangbang Cordova, samtang wala pay matumbok ang kapolisan nga responsable sa krimen.
Subay sa imbestigasyon ni PO2 Calixto Butantan sa Cordova Police, usa ka saksi nga molupyo sa maong lugar ang paingon nga maghakot og tubig dihang iyang naagi-an ang biktima nga nagbuy-od sud sa iyang payag nga abli ang pultahan ug nagkadugo.
Dihang gisusi sa mirespondeng kapolisan aduna kini samad pinusilan sa agtang nga gituohang nakaingon sa hinanali niining kamatayon.
Matud pa ni PO2 Millesa Tampus sa Cordova Police dihang nahinabi sa Banat News ang biktima adunay record sa ilang buhatan nga duha ka mga kaso sa pagpangawat ug gawas niini gitumbok pa usab kining notadong kawatan sa lungsod.
Panimawos ang unang gituohang motibo sa krimen nunot niining padayong imbestigasyon sa kapulisan pagtumbok ug pagsikop sa nagtago-tagong suspek. - BANAT NEWS