6 armadong lalaki nakaipsot, KG9, motor 'sakmit

CEBU, Philippines - Mga armadong lalaki gialarma sa kapolisan sa Pardo apan armas nalang ug motorsiklo ang naabtan sa kapolisan atol sa ilang pag-responde kagahapon sa kaadlawon diha sa sitio Sario barangay Bulacao.

Sa pakighinabi sa Banat News sa hepe sa Pardo Police station nga si Sr. Insp. Gilberto Ybañez Abellar Sr. kini mitug-an nga nakadawat sila og taho nga adunay mga armadong tawo sa nahisgutang lugar.

Tungod niini daling mirespondi sa maong lugar sila si SPO2 Melchor Jumamil, PO3 Joel Lacson ug PO3 Henry Abatayo tuod man aduna silay naabtang unom ka tawong nag-inom sa maong lugar.

Apan nakabantay ang unom sa pag-abot sa mga polis ug daling nanagan ug gibiyaan ang duha ka motorsiklo nga Motostar kolor itom ug adunay plate number nga FX-6410 ug ang Honda wave nga itom nga adunay plate number GI-6340.

Samtang nakuha usab sa dapit diin mag-inom ang unom ang high-powered gun nga 9mm Luger KG9 pistol.

Matod pa ni Abellar nga base sa ilang nadawat nga taho nga ang unom adunay gipangitang paryente sa usa ka chief tanod sa barangay Villa Bulsita apan ila pang sutaon ang kamatuuran niini. - BANAT NEWS