TESDA tabangan gihapon ni Tomas

CEBU, Philippines - Si outgoing Cebu City Mayor ug Cebu City South District congressman-elect Tomas Osmeña mibutyag nga karong naghinapos na ang iyang termino pagka-mayor sa dakbayan wala pa siyay mahimo sa dakong problema sa mga opisyales sa Technical Education Skills Development Authority kon TESDA.

Kini may kalambigitan sa kapakyas sa pagkuha sa TESDA sa gikinahanglanong pundo alang sa pagpadayon sa scholarship programs dinhi sa siyudad sa Sugbo.

Sigon pa sa TESDA, kansang mga opisyales nagpatabang ngadto kang Osmeña, nga niadtong nakalabay’ng bulan hangtud karon ang Department of Budget and Management (DBM) wala pa mo-release sa dili mominus sa usa ka milyon ka pesos alang sa education program sa ilang buhatan.

Matud pa sa TESDA nga sa higayon nga dili ma-release ang maong pundo sa dili pa ang bulan sa Hunyo maglisod sa pagpahimulos sa ilang programa ang mga eskolar niini.

Apan si Osmeña nagkanayon nga dili pa siya makatabang sa TESDA karon, apan sa higayon nga makalingkod na sa pagkapresidente si Senador Benigno ‘Noynoy’ Aquino mahimo siyang mohangyo nga matagad ang nahisgutang problema.

Samtang iyang gitataw nga sa higayon nga siya makalingkod na sa pagkakongresista sa Cebu City South District hayan makatabang usab siya sa paghangyo ang mga opisyales sa DBM nga madali ang pag-release sa maong pundo aron siguradong makapadayon sa ilang scholarship program ang TESDA. – BANAT NEWS