3 pusher nasikop

CEBU, Philippines - Nasikop sa kapolisan ang duha ka lalaki ug usa ka babaye human sila gikatahong naaktuhan nga naghupot og illegal nga drugas diha sa sitio Ylaya, barangay Marigondon dakbayan sa Lapulapu sa milabay’ng gabii.

Ang nasikop mao sila si Eduardo Lato, 49, Noria Bonghanoy, 47 ug Rubby Bonghanoy, 27 , mga residente sa maong dapit.

Nasayran sa Banat News nga ang mga sakop sa Intelligence Section sa kapolisan sa Lapulapu uban ni SPO1 Nonilon Etonilo Jr. misusi sa dapit human makakuha og impormasyon kabahin sa illegal drug operations diha sa maong dapit.

Tuod man ilang nasigpatan ang tulo ug ilaha kining gisitar ug gi-rekisa,si Lato nakuhaan og tulo ka gagmay’ng pakete sa gituhuang shabu, samtang si Noria nakuhaan og duha ka gagmay’ng pakete ug si Rubby nakuhaan og tulo ka gagmay’ng pakete nga may sulod nga gidudahang shabu gihapon.

Ang tulo pasakaan og kasong paghupot og ilegal nga drugas. – BANAT NEWS