House and Lot alang sa UV topnotcher

CEBU, Philippines - House and lot! Kini maoy pahalipay sa mga University of the Visayas (UV) ug UV Alumni Association Incorporated sa mga estudyante sa lima ka nag-unang mga kurso atol niining siyam ka tuig nga Centennial celebration sa maong unibersidad.

Ang mga estudyanteng ma- top notcher sa ilang board exams o Bar Exams gikan sa kursong Law, BS Nursing, Medicine, Engineering, Business Administration maoy makadawat sa 100 square meter house and lot nga nagkantidad og P1.7 milyon.

Si Dr. Jose Dodong Gullas, Executive Vice President sa UV nagkanayon nga ang UV nakahulma na og daghang mga propesyonal sukad sa katukoran niini niadtong 1919.

Gawas pa sa house and lot, i-refund usab ang tuition fee gikan sa first year hangtud sa ilang pag-gradwar; kadtong second, third, fourth ug fifth placers i-refund gihapon sa ilang tuition fees ug hatagan og pahalipay nga P500 mil, P400 mil, P300 mil, ug P200 mil.

Si Atty. Joseph Baduel, presidente sa UV Alumni mibutyag nga ang administrasyon sa UV ug Alumni duna nay gihan-ay nga mga kasabutan alang sa lote nga paliton nga nahimutang sa amihanang bahin sa Sugbo.

Matud ni Baduel nga ang tumong niini nga pagpasiugda sa maong proyekto aron ang mga estudyante sa UV maningkamot sa ilang pagtuon ug dili motapol pagtambong sa ilang klase.

Si Gullas nagkanayon usab nga ang sakop sa faculty sa UV ilahang gihagit sa pagsigurong maka-produce og topnotchers gikan sa ilang mga estudyante.

“I am also challenging the faculty, because they are the turning point to produce top notchers,” awhag pa ni Gullas.

Si Gullas mihinumdum nga niadtong tuig 1919 ang Visayan Institute gitukod sa iyang amahan nga si Don Vicente Gullas diin duna lang kini niadto 37 ka mga estudyante.

Niadtong tuig 1948 ang VI nahimong usa ka unibersidad ang unang unibersidad nganhi sa Sugbo.

Ang UV gitawag og University with a “H.E.A.R.T” nga nagpasabot H- Humanitarian Concern, E-Environmental Awareness, A-Appreciation of Cebuano Arts, Culture and Song, R-Respect of Human Rights ug T-Technology Advances.

Karong 2013 gikatakdang ipahigayon ang UV Alumni homecoming nga didto ipahigayon sa Estados Unidos, samtang ilusad usab ang librong magpatik sa mga nahimong serbisyo sa UV sa katawhan lakip na ang mga na-produce niining mga propesyunal.

Ang UV magsaulog sa ika-100 years sa 2019 diin matud pa ni Gullas nga duna pa silay giplanong mga proyekto sa maong tuig alang sa maong institusyon.

Karon ang UV nagsugod na sa ilang enrollment ug wala sila magpataas sa ilang tuition fees gikan sa elementarya hangtud sa kolehiyo. – BANAT NEWS