Tiggama pekeng ID sikop

CEBU, Philippines - Tiggama og mga peke nga identification cards sa Philippine National Police ug dokumento nasikop sa gipahigayong entrapment operation sa kapolisan kagahapon sa hapon diha sa atubangan sa usa ka dakung mall sa uptown, dakbayan sa Sugbo.

Ang suspetsado mao si Jude Dayaon Frencillo, 40, taga barangay Basak-Pardo, dakbayan sa Sugbo ang mag-atubang og kasong falsification of public documents.

Ang hepe sa Theft and Robbery Section (TRS) sa Cebu City Police Office nga si Sr. Insp. Bonifacio Garciano mibutyag sa mga tigbalita nga si Frencillo gi-aresto human niini gitunol ngadto sa iyang mga sakop ang peke nga mga ID sa PNP, mission order sa Military Intelligence Group (MIG) ug Regional Intelligence Division (RID).

Matud niini nga molungtad ngadto sa duha ka semana ang ilang gipahigayong surveillance batok kang Frencillo.

Ang hepe sa TRS mibutyag usab nga human sila makadawat og impormasyon kabahin sa transaksiyon ni Frencillo usa sa iyang mga tawo iyahang gimanduan nga mo-order og ID sa polis ug military.

Pagkahuman og gama sa ilang gi-order mipahigayon sila og negosasyon kang Frencillo nga ipa-deliver dayon ang mao nilang order.

Ang kapolisan ug si Frencillo nagkasabot untang mag-abot sa downtown area apan nausab ang maong sabot ug diha na sila magkita sa nahisgutang dakung tindahan sa Fuente Osmeña.

Dihang nasikop na si Frencillo sa mga polis mibutyag kini nga si Anielito Lao maoy iyang amo.

 Si Lao igsuon sa usa ka kagawad sa usa sa mga barangay sa dakbayan sa Sugbo.

Si Garciano nagkanayon nga si Lao mihimakak sa maong pasangil batok kaniya.

Si Frencillo ang mogama usab og pekeng mission order.

Ang mga polis misakmit usab sa usa ka USB gikan sa suspetsado diin iyaha kining gigamit sa pag-save og mga data.

Ang maong USB dunay sulod nga mga desinyo sa police ug military IDs ug peke nga form sa Transcript of Records (TOR) ug mga diploma.

Si Garciano mipasabot nga ang Camp Crame ug AFP sa Camp Aguinaldo ang pweding makaisyu og ID sa polis ug military.

Human masikop ang suspetsado, si Garciano midugang nga nangayo sila og certification gikan sa hepe sa Regional Intelligence Division (RID) nga si Senior Superintendent Ramon Melvin Buenafe pag-certify nga ang hepe sa RID wala mohatag og authority kang Frencillo nga mag-manufactured og mga ID.

Ang suspetsado kinsa nagtingkagol sa Fuente Police Station nagkanayon nga tungod sa kalisod maong mibuhat siya sa ilegal nga pamaagi.  - Gikan sa report ni Gabriel Bonjoc sa The Freeman (BANAT NEWS)