Brigada Eskwela matapos ugma

CEBU, Philippines - Pormal na nga gibuksan niadtong Lunes ang nasudnong programa sa Department of Education (DepEd) nga gitawag og National Schools Maintenance Week o nailhan usab isip “Brigada Eskwela” nga gitakdang matapos ugma, Biyernes, Mayo 28.

Usa sa mikooperar sa maong programa, mao ang Subangdaku Elementary School sa dakbayan sa Mandaue diin alas 9:00 pa lang sa buntag niadtong Lunes sa buntag, nagsugod ang mga maestra , ginikanan, alumni ug nagkadaiyang civic organization sa paglimpyo sa tagsa-tagsa ka mga lawak sa nahisgutan nga tunghaan.

Matud pa sa presidente sa Parent-Teacher Association sa maong tunghaan   nga si Peter Cuizon nga dako kaayo og natabang ang maong programa sa DepEd alang sa malinawon ug hapsay nga pagbukas sa klase karong Hunyo 15. 

“Nindot man ning programaha, kay inigkabukas sa klase, mo-focus na ang mga estudyante sa ilang pagtuon, wala na sila’y huna-hunaon kay limpyo naman ang ilang mga lawak, ug naayo na usab ang ilang mga lingkuranan,” saysay pa ni Cuizon dinhi sa Banat News.

Nag-awhag si Cuizon sa mga tawo nga mosuporta sa nahisgutang proyekto pinaagi sa pagdonar og mga butang nga puwedeng magamit sa pagpaayo sa mga lingkuranan sa tulunghaan sama sa lansang, pintal,   ug kahoy.

Ang tinuig nga Brigada Eskwela unang gipatuman niadtong tuig 2003 diin iatol kini panahon sa bakasyon aron hinloan ang palibot ug sulod sa eskuylahan ug ayuhon kadtong mga guba nga bahin sa tulunghaan uban sa pakig-alayon sa nagkalainlaing sektor sa katilingban. – BANAT NEWS