Compostela tensyonado na usab

CEBU, Philippines - Mitumaw ang tensyon sa lungsod sa Compostela ug diriyot magkagubot ang mga supporters sa mga kandidato sa pagkamayor sa maong lungsod bisan pa man og nahuman na ang piniliay sa Mayo 10.

Kini human nakit-an sa mga lunod-patay nga supporters sa nakadaug ug nangapilding mga kandidato ang pagbalhin sa mga balotang gigamit sa automated election gikan sa karaang mga ballot boxes ngadto na sa bag-ong ballot boxes.

Apan gitataw ni Provincial Election Supervisor Atty. Lionel Marco Castillano nasulbad ra sa iyang buhatan ang maong kagubot ug napasabot ang isi’g ka habig nga imbentaryo lamang kini. Matud pa ni Castillano nga iyang gimanduan ang iyang municipal election officer sa pagpahigayon og imbentaryo sa tanang mga balota uban ang presensiya sa kandidato, mga supporters niini ug ang miyembro sa Board of Election Inspector kon BEI ug ang municipal treasurer.

Kini aron makita sa imbentaryo nga wala pang-ilisi ang maong mga balota ug igo rang gibalhin ngadto sa mas dako nga ballot boxes.

Gipasabot ni Castillano nga wala siyay nakitang kasaypanan sa gihimo sa municipal treasurer tungod kay iya man discretion kun unsaon niini pagtago ang mga balota sulod sa iyang buhatan. Samtang gitataw ni Castillano nga ang gihimo niya sa Compostela mao usab ang iyang gihimo didto sa lungsud sa Carmen diin ang outgoing mayor nga si mayor Sonia Pua mikwestyon sa pagbalhin sa municipal treasurer sa mga ballot boxes ngadto sa usa sa bodega.

Ang mga balota sa Compostela gihigpitan pagbantay tungod sa plano sa mga pilderong mga kandidato nga mosang-at og reklamo ngadto sa korte. –BANAT NEWS