Benhur: Praktikal pagtapon sa LP

CEBU, Philippines - Gikompirmar ni 4th district Kong. Benhur Salimbangon, usa sa mga kongresista nga miyembro sa Cebu bloc nga gitukod ni Gob. Gwendolyn Garcia sa One Cebu Party nga nagtinguha gyud siyang mobalhin gikan sa Lakas-Kampi-CMD ngadto sa Liberal Party nga partido ni incoming president Sen. Benigno ‘Noynoy’ Aquino.

Matud pa ni Salimbangon sa interbyu sa DyRF nga normal ra sa usa ka politiko nga mobalhin og laing partido pagkahuman sa election ilabina ngadto sa partido sa dumadaug nga presidente.

“Mao na man gyud nang naandan sa atong nasud kun asa ang kalambuan ug kaayuhan adto ta,” sigon pa ni Salimbangon.

Si Salimbangon nikutlo pa gani sa kinaham na kaayong pamulong sa usa sa mga banggiitang presidente sa Estados Unidos nga si Theodore Roosevelt nga nagkanayon nga “My loyalty to my party ends when my loyalty to my country begins.” Gipasabot ni Salimbangon nga dili siya motamod sa prinsipyo sa partido lamang kundili ang interes gyud sa iyang mga konstituwente.

“Dili ta partisan-partisan tungod lamang sa atong prinsipyo ug personal kun dili alang sa kaayohan sa tanan,”pasabot pa niini.

Miingon si Salimbangon nga sa pagkakaron practical siya kaayo niining higayona ilabina sa nidaug dinhi sa lalawigan sa Sugbu si Aquino tungod kay ang iyang tinuoray nga katuyuan sa pagdagan sa pagkakongresista mao man ang kaayohan sa katawhan ug dili ang kaugalingong kaayohan.

Miklaro hinuon si Salimbangon nga wala pa hinuon hingpit nga makadesisyon ang iyang mga kaubanang kongresista sa One Cebu Party nga motapon sa LP tungod kay mohimo pa sila og makuting sabot-sabot.

Apan iyang gitataw nga ang ilang partido bukas alang sa pagpakig-alayon sa Liberal Party kun ang ilang representasyon didto sa ubos Balay Balaoranan gikinahanglan.   (BANATNEWS)