PNP mopatuman sa Balik Eskuwela

CRBU, Philippines - Ipatuman na usab og balik ang “Balik Eskuwela” sa kapolisan sa dakbayan sa Sugbo nunot sa pagbukas sa klase sa elementarya ug kolehiyo karong sunod buwan.

Si Sr. Supt. Patrocinio Comendador, hepe sa kapolisan sa dakbayan sa Sugbo nagkanayon nga magbutang siya og duha ka polis sa matag tunghaang pribado o iya sa gobyerno inig abli sa klase karong Hunyo 15.

Miingon si Comendador nga pahugtan usab nila sa pagbantay ang mga batan-ong tinun-an inig sugod sa klase ug ilang i-implementar ang liquor ban subay sa nalatid nga ordinansa sa kagamhanan sa siyudad.

Gawas niini, ang mga street gang nga posibleng mosiaw atol sa abli sa klase monitoron nila pag-ayo ug panid-an ang mga lugar nga kanunay’ng tapokan niini.

Sa samang higayon giawhag usab ni Comendador ang matag tulunghaan nga magbaton og kaugalingon nilang security guard aron pagsiguro sa mga estudyante diha sa sulod sa eskuylahan, samtang ang kapolisan mao usab ang magbantay sa gawas sa tulunghaan.

Samtang giawhag ni Comendador ang mga tinun-an ilabi na kadtong gikan pa sa laing probinsya nga dili gyud mo-kompiyansa sa ilang mga butang, sama sa cellphone, alahas ug kuwarta ilabina kun magsakay og PUJ kay dilikado kaayo nga mabiktima sila sa mga badlungon sa katilingban.

Gani midugang si Comendador nga kun adunay adtuon nga laing lugar ang mga bag-ong tinun-an kinahanglang magpakuyog og kauban nga suhito dinhi sa dakbayan aron malikay sa mga kriminal.

Gawas niini si Comendador midugang nga angay likayan ug dili mag-apil-apil sa unsa mang grupo sa mga street gang.

Matud pa ni Comendador nga mopahigayon usab sila og seminar sa mga tunghaan aron hatagan sila og kasayoran kun unsaon paglikay sa mga kremin. (BANATNEWS)