CEBU, Philippines - Kritikal ang kahimtang sa duha ka bayong-bayong nga gipamusil didto sa Brgy. Ibabao, dakbayan sa Mandaue kagahapon sa kaadlawon.
Ang mga biktima mao sila si Raymond Briones, 17, ug Donel Commendador, 16, nga pulos taga barangay Ibabao.
Sa pasiunang imbestigasyon sa kapolisan sa Mandaue City Police Office (MCPO) nasuta nga samtang nagbarugbarog ang duha ka biktima sa maong dapit may duha ka tawo nga kalit lang miduol kanila ug dayong pamusil.
Si Briones nasabak sa walang bahin sa ulo, samtang si Commendador naigo sa iyang walang abaga sa wala pa matinong klase sa armas de fuego.
Ang mga biktima daling gihatod ngadto sa Mandaue City Hospital ug si Briones diha sa talandugong kahimtang sa pagsuwat ning balita, samtang si Commendador nagpaalim usab sa iyang samad sa abaga.
Ang kapolisan nagduda nga adunay kalambigitan ang maong pagpamusil sa mga gang war sa maong dapit. (BANATNEWS)