Environmentalists gitambagang dili magpasulabi og estrikto

CEBU, Philippines - Gihangyo ni 4th district congressman Benhur Salimbangon ang mga environmentalists dinhi sa Sugbu nga molugak sa ilang pagbabag ug paggukod sa mga proyekto ug development sa gobiyerno.

Ang panawagan ni Salimbangon iyang gipalanog taliwala sa nakita sa kongresista sa ka kritikal karon sa problema sa power supply dinhi sa Sugbu.

Si Salimbangon wala hinuon mibasol ngadto sa mga environmental lawyers dinhi sa Sugbu nga gipangulohan ni Atty. Benjamin Cabrido ug Atty. Gloria Estenzo Ramos nga maoy nakatampo sa problema sa power shortage nunot sa pagprotesta sa katukoran sa Korean Electric Power Corporation kon KEPCO.

Apan iyang gitataw nga ang mga protesta sa mga grupo sa mga environmentalists nahasol sa mga opisyales sa gobiyerno nga nagtinguha nga makapangita og mga investors nga mububo og puhonan sa power generation industry.

Gihangyo ni Salimbangon ang mga environmentalists nga dili lamang unta pasubrahan ang ilang estrikto kaayong pagpatuman sa balaod sa kinaiyahan.

Kini tungod dili gyud malikayan ang kadautan sa palibot kay mao kini ang epekto sa kalamboan nga ipatuman sa gobiyerno dili lamang dinhi sa Sugbu apil sab ang tibuok nasud ug sa laing nasud.

Apan iyang giklarong angayan lamang nga mahatagan og kasigurohan nga dili masubrahan ang kadautan nga mahimo sa development pinaagi sa pagpatuman og mga safety measure subay sa napatik sa balaod.

Dugang pa niini nga tulo sa sakripisyo sa katawhan dako usab kini og mahatag nga kalamboan sa umaabot nga mga panahon alang sa mga Sugbuanon ilabina sa pagsulbad sa problema sa power shortage nga nasinati karon sa mga Sugbuanon. – BANAT NEWS