Versoza mosayo'g retiro

CEBU, Philippines - Gipahibalo ni PNP Director General Jesus Verzosa ang kaandam sa pag-retiro og sayo sa serbisyo karong katapusang bahin sa sunod buwan kun maoy buot nga mahitabo sa mosunod nga pangulo sa nasud.

Sumala pa ni Verzosa niadto pa untang wala pay eleksyon siya naglaraw nga mobiya sa serbisyo gani niadto pang buwan sa Enero pa niya kini gipahibawo sa mga command conferences sa mga ginsakupan.

Gipasabot niya nga ang iyang pag-retiro mahitabo inig lingkod na unya sa bag-ong pangulo sa nasud kun kini maoy kabubut-on sa naulahi nga nagpasabot karong Hunyo 30.

Matud pa niya gusto niyang mobalik sa pribadong kinabuhi ug mobalik sa ilang umahan.

 “I want also to experience private life and I’m fond of farming maybe I’ll go back to my roots, to our family farm,” sumala pang Verzosa sa mga sakop sa tigbalita human sa Thanksgiving Mass diha sa Cardinal’s Palace kagahapon.

Giplano usab ni Verzosa nga sa dili pa siya mo-retiro buot niyang mahatagan og ikaduhang bituon si Police Regional Office-7 director Chief Superintendent Lani-O Nerez.

“Maybe we need to plan out how he will get the second star before he is prohibited from promotion,” matud pa niini base sa PNP Law, gidili ang promosyon kun dili na moabot og usa ka tuig ang nahibiling panerbisyo sa usa ka polis.

Base sa balaod, ang usa ka sakop sa militar o kapolisan mahimong makaretiro gikan sa serbisyo ini og abot sa edad nga 56 apan ang pangulo sa nasud mahimong maka-extend niini kun nakita niining alang sa kaayohan sa maong organisasyon ug sa kinabag-an.

Si Verzosa gikatakdang moabot sa edad nga 56 karon pang Disyembre 25, 2010 base sa usa ka pamahayag sa website sa Alpha Phi Omega fraternity website nga diin siya masakop.  – BANAT NEWS