CEBU, Philippines - Gipahibawo kagahapon sa Department of Education (DepEd) nga ang mga tulunghaang elementarya ug sekondarya nga pribado, dili makapa-umento sa ilang bayranan sa eskuylahan sa tuig tingtungha 2010 hangtod 2011.
Sumala sa taho sa ABS- CBN, si kalihim Mona Valisno sa DepEd nahinangop pag-ayo tungod kay wala sila makadawat og hangyo gikan sa mga tag-iya sa pribadong eskuylahan kalabot sa umento sa bayranan.
Gipahibawo usab ni Valisno nga ang klase sa elementarya ug high school magsugod na sa Hunyo 14.
Matud niya nga gipaabot nilang mokabat sa 22 milyones ka mga estudyante sa elementarya ug high school ang motungha karong tuiga.
Ang maong gidaghanon labaw og usa ka milyon kay sa gidaghanon sa kinatibuk-ang populasyon sa mga estudyante sa maong mga ang-ang sa miaging tuig.
Ang bahin usab sa mga libro, si Valisno nagkanayon nga nasulbad na ang maong suliran tungod kay sa pagkakaron, gigahinan na og tagsa ka libro ang matag usa ka estudyante.
Matud pa niya nga ang mga bag-ong libro nabatunan na sa DepEd pinaagi sa donasyon gikan sa pribadong sektor nga mikabat sa P7 bilyones.
Sa laing bahin, ang DepEd nagkinahanglan karon og kapin sa 5,123 ka mga lawak klasehanan ug 800 mil ka mga lingkoranan alang sa tunghaang elementarya ug sekondarya sa kagamhanan.
Midugang siya nga pinaagi usab sa tanang sa mga ginikanan, non government organization ug sa pribadong sektor, ang kagamhanan makahimo kaayo sa paghatag sa tanang kinahanglanon sa mga estudyante. (BANATNEWS)