Piniriso napusilan sa polis

CEBU, Philippines - Samdan ang usa ka piniriso nga nag entertain sa iyang bisita gawas sa karsel human kini aksidenteng napusilan sa usa sa mga polis pasado alas-11 sa buntag sa miaging adlaw sa lungsod sa San Remegio.

Ang nasamdan nailhan nga si Jaime Sasing kinsa nag-atubang og kasong rape samtang ang polis nga nakapusil kaniya nailhan nga si PO2 Marcelo Tabolong.

Sa kasuko ni Digal, buot niyang paesplikahon ug ipa-liqour test ang maong polis sa pagdudang hubog kini niadtong tungura maong aksidente niining nakablitan ang armas.

Base sa gipadalang mensahe sa hepe sa kapolisan sa lalawigan sa Sugbo, Superintendent Erson Digal, dinhi sa Banat News, mibutyag kini nga samtang ang piniriso nagkalingaw og entertain sa iyang bisita sa gawas nga bahin sa iyang selda kalit lang usab nga mibuto ang armas ni Tabolong.

Matud pa sa pasiunang eksplinasyon sa maong polis aksidente niyang nakablitan ang gatilyo sa iyang .9mm service pistol dihang iyang gibalhin sa pikas nga bahin sa iyang hawak.

Ang biktima nga nakaangkon og samad pinusilan sa iyang bagtak dali usab kining gidala sa tambalanan.

Si Digal dihang gihinabi sa Banat News mibutyag nga iya nang gimandoan ang hepe sa San Remegio nga si Insp. Rolly Lauron sa pagsumiter og incident report kabahin sa hitabo.

Dugang pa ni Digal nga iya usab nga pa-esplikahon si Lauron nganong gitugutang makagawas si Sasing niadtong tungura.

Butyag usab ni Digal nga posibleng mag-atubang og kasong administratiba ang hepe kini kun mapamatud-an nga siya nakalapas sa ilang balaod.   (BANATNEWS)