Dispatser gipauwana'g bala namatay

CEBU, Philippines - Usa ka dispatcher ang gipaulanan og bala sa duha ka lalaking nagmotor pasado alas-7 sa miaging gabii sa dalan Soriano St. sa barangay Mabolo ning dakbayan.

Si Anecito Ruiz, molupyo sa sitio Mahayahay barangay Carreta ug lumad nga taga Tagnukan lungsod sa Borbon, samtang ang mamumuno gihulagway lang nga nagsul-ob og bull caps, nag-sleeveless ug nagtabon kini og panapton sa ilang mga nawong.

Sa pakighinabi sa Banat News ni PO3 Michael Codaste mibutyag nga nagbarog-barog ang biktima daplin sa karsada dihang kalit lang nga gihunongan sa usa ka motorsiklo ug ang backrider mikanaog dayong pusil sa biktima.

Ang gunman kalma usab kaayong mibalik sa motorsiklo ug mibiya sa dapit padulong sa North Reclamation Area, samtang ang biktima daling gidala sa iyang mga anak nga lalaki sa Cebu City Medical Center.

Apan pipila ka minutos namatay kini tungod sa mga naangkon niining samad pinusilan sa ulo, tiyan ug dughan.

Matud pa ni Codaste nga wala pa sila masayod kun unsay motibo sa pagpatay. Nakuha sa crime scene ang siyam ka kabhang sa kalibre .9mm ug laing duha ka slugs.  – BANAT NEWS