CEBU, Philippines - Pasakaan og kasong pagmolestiya ang usa ka Amerkano nga gipasanginlang nanghinol sa usa ka physical therapist sa Vicente Sotto Memorial Medical Center niadtong adlaw’ng Huwebes.
Ang gireklamo ug gipasakaan og kasong acts of lasciviousness ngadto sa City Prosecutors Office mao ang usa ka Roger Murrel, temporaryong nagpuyo sa usa ka balay abanganan dinhi sa siyudad sa Sugbu.
Ang biktima nga usa ka 23 anyos, physical therapist sa maong tambalanan miduol sa Intelligence Management Branch sa Cebu City Police Office aron pagsumbong sa gihimo ni Murrel kaniya.
Matud pa sa biktima nga usa siya sa mga niatiman sa mga pasyente sa rehabilitation center sa Vicente Sotto Memorial Medical Center dihang misulod si Murrel.
Sumala pa niini, samtang iyahang giatiman ang suspek kalit nga gihikap sa naulahi ang iyang sampot hinungdan nga nakugang siya ug diha-diha migawas dayon ang suspek.
Ang kapolisan daling mipahigayon og hot pursuit operation hangtud nga nasundan si Murrel sa ilang balay diha sa barangay Pardo nga diin siya mag-abang ug gidakop. – BANAT NEWS