Puganteng suspek sa rob-murder sa engineer mi-deny

CEBU, Philippines - Mitahan sa iyang kaugalingon ug mipakita og dokumentong naglimpyo sa iyang pangalan ang binilanggo nakaeskapo sa dakbayan sa Lapulapu nga si Joshua Sayson.

Si Sayson mieskapo sa Lapulapu detention cell sa milabay’ng Domingo pinaagi sa pagputol sa rehas gamit ang kwerdas sa gitara human siya malutsi og warrant of arrest sa kasong Robbery with Homicide.

Matud pa ni Sayson nga mitahan diha sa Cebu City Police Office niadtong milabay’ng adlaw gumikan sa iyang nabasa sa Banat News nga siya maoy gitumbok sa kapolisan nga suspek sa pagpusil patay kang Engr. Rexel Gonzales niadtong Mayo 22, 2009.

Sumala pa niya mitahan siya aron limpyuhan ang iyang pangalan human makakuha siya og kopya sa certification gikan sa Cebu City Jail nga siya napriso pa dihang nahitabo ang krimen niadtong petsa 22 sa bulan sa Mayo tuig 2009.

Base sa Certification ni Jail Warden Supt. Efren Nemeño , si Sayson nabilanggo sa ilang pasilidad niadtong Marso 20, 2009 sa kasong kalapasan sa RA 9165, Theft ug paghupot og mahait nga hinagiban ug nakagawas niadto lang Abril 21, 2010 human makaserbisyo sa iyang sentensiya.

 Gumikan niini kampante si Sayson nga sayop ang kapolisan sa paglambigit kaniya sa pagtulis ug pagpusil-patay kang Gonzales nga maoy gibasehan sa Warrant of Arrest batok kaniya.

 Apan si Lapulapu City Police Office Director Sr. Supt. Mariano Natu-el Jr. mipadayag nga ang korte lamang maoy mo-desider niini human makapakita og dokumento gikan sa CCJ si Sayson ug ang korte usab maoy moklaro kun may kalambigitan ba kini sa maong krimen.

 Matud pa ni Natu-el, dunay saksi nga positibong mitudlo kang Sayson nga maoy responsable sa pagtulis ug pagpusil patay ni Gonzales.  – BANAT NEWS