Habal-habal driver napusilan patay

CEBU, Philippines - Laing drayber sa habal-habal ang gipusil patay sa duha ka lalaking nagmotor pasado alas-5 sa hapon kagahapon diha sa sitio Nazareth barangay Buhisan ning dakbayan.

Ang namatay mao si Christino Atillo, 38, taga sitio Kwako barangay Buhisan samtang ang mamumuno nakit-an lang nga nagmotor.

Base sa imbestigasyon sa kapolisan ang biktima mikanaog sa iyang motor dihang kalit nga mipatim-aw ang duha ka mamumuno ug ang back rider midiretso pagpusil sa biktima sa nagkadaiyang parte sa lawas.

Ang mga mamumuno daling mipasirit palayo sa maong dapit. Mao na kini ang ikaduhang insidente sa pagpamusil sa mga drayber sa habal-habal sa bukirang bahin ning dakbayan karong semanaha.

Nakuha sa kapolisan sa crime scene mao ang upat ka kabhang sa kalibre .45 nga gituohang maoy gigamit sa pagpusil sa biktima apan wala pa gyud nila matino kun unsay motibo sa pagpatay kang Atillo.   – BANAT NEWS