CEBU, Philippines - Gipasakaan na og kaso sa kapolisan ang upat ka tulisan nga nadakpan atol sa follow up operation human sa pagtulis sa usa ka babaye nga nagpaabot og PUJ pauli sa ilang panimalay sa dakbayan sa Lapulapu.
Ang mga dinakpan giila ni Opao Police Station chief Sr. Insp. Alfredo Ortiz nga si James Carl Flores, 19, taga barangay Alang-Alang.
Matud pa ni Ortiz nga si Flores migiya sa kapolisan sa pagkasikop sa tulo ka mga kauban niining tulisan nga sila si Junrey Antolijao, 19, taga barangay Looc, Narcesiso Bahan, ug Romar Repaja, pulos taga barangay Umapad. Silay gitumbok nga namusil sa negosyante og scrap iron sa barangay Opao sa miaging bulan.
Gipasakaan sila og kaso human giila sa biktima nga si Rachel Ibasco, 44. Si Ibasco gitulis sa dihang nag-atang og PUJ sa miaging gabii sa dalan A.C. Cortes paingon sa Lapulapu. Nakuhaan si Ibasco og P500 ug mga ATM card. – BANAT NEWS