CEBU, Philippines - Nayasyas ang tiyan sa usa ka tawo dihang gidunggab kini sa iyang silingan sa sitio Bag-ong dalan sa barangay Bangbang, lungsod sa Cordova sa miaging gabii.
Ang biktima mao si Roland Brazil, 27, minyo, samtang ang suspetsado mao si Robinson Minguito, hingkod, nga pulos managsilingan sa Bangbang.
Si PO2 Manfred Maarat sa Cordova Police Station nga nahinabi sa Banat News miingon nga nakigdula pa og tong-its sa mga silingan ang biktima.
Human makapupho sa tanang pustada sa maong sugal, dali usab kining misakay og traysikol ug miadto sa merkado sa lungsod aron mamalit og makaon para sa panihapon.
Dugang pa ni PO2 Maarat nga pipila ka gutlo ang nakalabay nahibalik sa maong dapit sa biktima, apan wala kini makabantay dihang kalit siyang gidunggab sa suspetsado nga nag-atang kaniya.
Gumikan sa kahait sa maong armas, dali kaayong nayasyas ang tiyan sa biktima. – BANAT NEWS