DOH, Dep-Ed nag-usa sa programa batok AH1N1

CEBU, Philippines - Makigtambayayong ang Department of Health (DOH)-7 ngadto sa Department of Education (Dep-Ed)-7 alang sa subling paglusad sa ilang programa batok sa AH1N1 virus nunot sa subling pagbukas sa klase karung sunod buwan.

Kini gumikan sa kabalaka nga posibleng mosiaw na sab ang maong balatian tungod sa pagtumaw unya sa ting-uwan sa sunod buwan ug pagbukas sa klase karung Hunyo 14 sa pampublikong tunghaan.

Tuyo sa DOH-7 nga banhawon ang ilang monitoring teams sa AH1N1 virus ug uban pang makatakod nga sakit diha sa mga tunghaan.

Si Dr. Enriquez Zancho ang influenza point person sa DOH-7 nagkanayon nga dako ang posibilidad nga mosiaw pagbalik ang AH1N1 flu virus sa mga tunghaan gikan sa bulan sa Hunyo hangtud sa Hulyo, gumikan kay dili tanan ang nahatagan og bakuna batok sa flu virus pinaagi sa gihatag nga bakuna sa World Health Organization (WHO). Ang DOH-7 nagsugod na sa pagpanghatag og libreng bakuna ngadto sa high risk sa maong balatian ngadto sa mga health workers dinhi sa Sugbu ug ubang dapit sa Central Visayas. Samtang gikatakda usab nga mohatag og libreng bakuna ang DOH alang sa mga babayeng mabdos, mga bata nga nagpanuigon singko paubos ug sa mga hamtong nga nagpangidaron gikan sa 60 pataas.

Sa laing bahin, ang City Health Epidemiologist and Surveillance Unit mipahimangno sa katawhan sa posibleng pagdaghan sa mga kaso sa sakit nga Dengue gumikan sa umaabot nga ting-uwan.  - Rey Pasaporte ug Georgette Solitario (BANAT NEWS)