CEBU, Philippines - Si Colonel Nestor S. Porlucas kinsa maoy leader sa 701st Community Defense Center, sa 7th Regional Community Defense Group Army Reserved sa Camp Lapulapu ning dakbayan sa Sugbo, miawhag sa iyang mga opisyal nga magpahigayon og Battalion Assembly agi og pagtuman sa mando sa labaw nilang opisyal nga si Major Soliver C. Peras.
Ang maong tigum sugdan sa alas 8:00 sa buntag sa Mayo 21 nga molungtad hangtod sa Mayo 23, 2010 diha sa Covered Court sa Central Command (CENTCOM) sa Camp Lapulapu.
Ang himoong panagtagbo sa mga reserbang kasundalohan gitumong aron mabaid pag-ayo ang ilang kaalam ug kaantigohan, kahanas ug katakos subay sa ilang nakat-unan atol sa ilang training.
Sutaon usab sa ilang labaw’ng opisyal ang gidaghanon nilang tanan aron matino kun andam ba sila kun adunay mga dagkong kombati.
Sa maong panagtagbo motambong usab si Lieutenant Colonel Gwendolyn Garcia, gobernador sa Probinsya sa Sugbo sa Mayo 21, 2010 isip Guest of Honor ug Speaker sa maong kalihukan. – BANAT NEWS