Ika-27 nga AIDS Day gisaulog

CEBU, Philippines - Ang Acquired Deficiency Immune Syndrome (AIDS) usa ka sakit nga mananakod ug makapaluya sa kondisyon sa lawas sa usa ka tawo ug sa iyang immune system nga mosangpot sa iyang kamatayon.

Sa miaging adlaw gisaulog ang ika-27 nga anibersaryo sa AIDS Day nga gipahinungod sa mga nangamatay na gumikan sa maong sakit.

Ang mga suhito ning maong sakit nagkanayon nga kutob sa mga tawong makighilawas sa usa ka masakiton og HIV dili gyud makaikyas sa maong sakit.

Gawas sa pakighilawas, ang AIDS motakod usab pinaagi sa dugo sa usa ka tawo nga aduna’y HIV.

Gani bisan ang usa ka anak nga gisabak sa usa ka inahan nga masakiton og AIDS matakdan usab niini.

Ang mga suhito niining AIDS nagkanayon nga ang tawong maligo sa tubig nga gikaligoan sa masakiton og AIDS dili matakdan sa maong sakit.

Bisan ang kutsara, baso, nga gamiton sa may AIDS dili gihapon makatakod og laing tawo, bisan ang pakiglamano sa usa ka may AIDS dili usab peligro.

Sumala sa mga batid, ang tawo nga adunay AIDS makaangkon og nagkalain-laing komplikasyon sa lawas , dali nga maimpeksyon, ug dali kaayong mataptan sa kanser, pangapoy, maghigos hangtod nga mamatay.

Ang mga simtoma sa maong sakit mahibaw-an sulod sa 5 ngadto sa 8 ka tuig human ang HIV makatapot sa lawas sa tawo. 

Ang tawo nga may HIV kinahanglang mokonsulta ngadto sa mga doktor nga may kasinatian usab sa pagtambal niini. Ang mga suhito niini, miawhag sa publiko nga magmabinantayon pinaagi sa dili pagpatuyang og pakighilawas ni bisan kinsang babaye o lalaki nga dili kapikas sa kinabuhi sa usa ka tawong minyo.

Alang sa mga ulitawo ug dalaga, mas maayong mogamit gyud og condom kun makigkombati sa kama sa mga tawong dili nila sinati ang kahimtang sa lawas.  – BANAT NEWS