CEBU, Philippines - Giproklamar nga ika-napulong senador ang igsuon ni Mayor Tomas Osmeña nga si Sergio Osmeña III uban nila ni incumbent Senator Manuel Lapid, ug Bukidnon Rep. Teofisto Guingona III.
Samtang wala pay gi-proklamar nga ika-13 nga senador hulip sa biyaang pwesto ni Sen. Noynoy Aquino kinsa mao karoy nag-una sa eskutenyo sa ihapay sa botos sa pagka-presidente sa nasud sa milabay’ng piniliay.
Ang Comelec nga mao karoy national board of canvassers mi-proklamar kang Osmeña isip ikanapulong napiling senador base sa nakuhang botos nga 11,583,854 base sa labing uwahing naihap nga botos niadtong Lunes.
Sunod kang Osmeña si Lapid ug Guingona sa nakuhang 10,971,045 ug 10,200,293 sumala pa sa report sa GMA New.TV.
Kahinumduman nga niadtong Sabado gi-proklamar sa Comelec sila si Sen. Ramon “Bong” Revilla, Sen. Jinggoy Estrada, Sen. Mirian Defensor-Santiago, Sen. Franklin Drilon, Sen. Juan Ponce Enrile, Sen. Pia Cayetano, Sen. Ferdinand “Bongbong” Marcos Jr., Sen. Ralph Recto ug Sen. Vicente Sotto.
Gipasabot sa Comelec nga gibase ang proklamasyon niadtong Sabado sa 115 ka certificates of canvass (COC) samtang 121 COC ang gibasehan sa proklamasyon sa tulo ka senador kagahapon nga 75.2 porsiyento sa kapin 50 milyones nga botante.
Matud pa ni Comelec chairman Jose Melo, bugtong ang COC sa Lanao del Sur ug ubang probinsya sa nasud nga gamay lamang og botante ang wala pa maihap apan di na kini makaapekto pa. – BANAT NEWS