Giiloga'g motor gipusil sa nawong

CEBU, Philippines - Patay diha-diha ang usa ka habal-habal drayber dihang gipusil sa duha ka nagmotorsiklong mga armadong lalaki diha sa sitio Satohan, Sudlon ning dakbayan pasado alas 6:00 sa buntag kagahapon.

Ang biktima nailang si Danilo Tabal, taga sitio Kunsit, Sudlon I ning dakbayan, samtang ang nakapusil kaniya mao ang duha ka tawong nagsakay og kolor blue nga motorsiklo.

Sumala pa ni PO3 Jeffrey Gutual sa Homicide Section dihang nahinabi sa Banat News, ang biktima naghatud pa sa iyang pasaherong naila si Margie Islanan, 35, diha sa sitio Botong, Sudlon II.

Si Islanan mibutyag nga dihang siya nanaog na sa motorsiklo sa biktima kalit miabot ang mga lalaking nagtaptap sa ilang mga nawong ug nangutana ni Tabal nga “Hain ang dalan padulong sa Cebu City?” mitubag si Tabal nga “dihang dalana, subaya lang na.”

Human sa maong pagpangutana, nakurat si Islanan nga gikalit nalang pagpusil sa usa ang biktima tulo ka higayon ug diha-diha nalup-og ang drayber ug natagak sa iyang TMX nga motorsiklo.

Tungod sa kahadlok nanagan ang saksi ug ilang nakit-an nga gikuha sa mga gikatahapan ang motor ni Tabal nga may plakang 999-2GP ug daling mipahilayo sa maong dapit.

Nakaangkon ang biktima og samad pinusilan sa iyang nawong, agtang ug tuong kilay nga maoy hinungdan sa iyang hinanaling kamatayon ug wala na madala pa sa hospital.

Wala makuha ang plate number sa motorsiklo nga gigamit sa mga armadong lalaki kay human sa maong hitabo, dali ra pud kining misibat pahilayo sa maong dapit. – BANAT NEWS