Cashier gipusposan

CEBU, Philippines - Kritikal ang kahimtang sa usa ka kahera sa usa ka panaderiya dihang nakigbugno kini sa mga tulisan ug gipusposan siya sa pala nga para sakwat sa pan ngadto sa hurnohan, didto sa dalan Plaridel, barangay Alang-Alang, sa miaging kaadlawon.

Ang biktima mao si Rachelle Bayate, 23, dalaga nga taga Guimbuangan, lungsod sa Barili ug cashier on duty sa Julies Bakeshop sa dalan Plaridel.

Si PO3 Roberto Neri sa Investigation Division and Management Bureau (IDMB) nga nahinabi sa Banat News miingon nga duha ka wala hiilhing mga lalaki nga pulos batan-on ug kasarangan ang pamarog maoy nagtulis sa biktima.

Matud pa ni Neri nga nagpakaaron-ingnon nga kustomer ang duha ka tulisan pinaagi sa pagpalit og pan ug dihang nakahigayon sa pagsulod sa nahimutangan sa kahera, kalit lamang kining mideklarar nga tulis uban sa pagtion sa ilang armas de fuego ngadto sa biktima. Gipugos pagkuha sa mga tulisan ang kuwarta nga gisulod sa kaha apan dali kining giwakli sa biktima.

Ang tulisan nga naglagot mipunit sa pala nga gamiton sa pagsakwat sa pan ngadto sa hurnohan ug maoy gipuspos ngadto sa ulo ug kalawasan sa biktima hangtod nga kini nakuyapan.

Gikuha sa mga tulisan ang kuwarta sa kaha nga wala matino ang kantidad ug nagdali kini sa pagsibat pahilayo sa maong lugar.

Sa pagkakaron padayon pang gipangita sa kapolisan ang maong mga tulisan. (BANATNEWS)