CEBU, Philippines - Bisan sa kabalakang magnihit ang supply sa bugas dinhi sa Kabisay-an nunot sa epekto sa El Niño phenomenon apan dunay maayong balita kay dunay nangabot nga imported nga bugas dinhi sa Sugbu ug ubang lugar sa Kabisay-an.
Kini maoy gipahibawo sa tigpamaba sa National Food Authority (NFA)-7 nga si Lucy Rosales nga dunay P120 mil ka sakong bugas humay ang nangabot nga gikan sa Vietnam alang sa Sugbu.
Matud ni Rosales nga igo na kaayo kining maong gidaghanon sa bugas human nga maka-supply sa Rehiyon 7. Ang NFA-7 mao sab ang nag-supply og bugas sa ubang lugar sa Rehiyon 8 nga naglakip sa Samar ug probinsya sa Leyte.
Gipahibawo niining adunay 2.3 ka milyon ka sakong bugas humay sa nagkadaiyang bodega sa NFA nga magamit kun ugaling modugay pa ang El Niño phenomenon .
Hinuon sa sayo pa, ang Pag-asa-Mactan mipahibawong posibleng karun pang katapusang semana sa bulan sa Hunyo o ba kaha sa unang semana sa bulan sa Hulyo magsugod ang pag-uwan-uwan. (BANATNEWS)