Mastermind gunman sa kapitan murder 'ilhan

CEBU, Philippines - Nailhan na ang mastermind lakip na ang gunman sa mibanhig patay sa barangay kapitan sa Ocaña dakbayan sa Carcar niadtong Biyernes sa kaadlawon.

Kini ang gibutyag ni PRO-7 Chief Supt. Lani-O Nerez kinsa nagdumili pagtug-an sa pangan sa mastermind sa nibanhig patay ni Jose Husain.

Si Husain patay diha-diha dayon human natusak sa bala sa .45 nga kalibre sa armas og .38 revolver ang kalawasan niini lakip na ang ulo dihang gipaulanan og bala sa wala mailhing mamumuno diha sa sitio Bacsije, Ocana.

Mas gihatagan og gibug-aton sa nagpadayon nga imbestigasyon sa kapolisan ang drugas nga maoy nagpaluyong motibo sa pagbanhig patay sa biktima ug dili politika.

Si Husain supporter sa bise mayor nga si Neci Apura ug karun midaog pagkamayor sa dakbayan sa Carcar niadtong milabay’ng eleksyon, apan base sa nakuhang impormasyon mas bug-at pa ang hinungdan sa pagpatay kun sa anggulong illegal drugs ang motibo.

Sumala pang Nerez usa sa nangusog ang biktima sa kampanya sa illegal nga drogas nga nakaingon sa kalampusan sa awtoridad diha sa maong dakbayan.

Si Nerez nagdumili hinuon pagtug-an kun duna bay nalambigit nga politiko sa pagbanhig sa biktima apan igo lang miingon nga posibleng aduna apan dili pa nila mahimong ipublikar.

Kagahapon gitukod dayon ang independent units nga maoy motutok ug mogukod sa problema sa drugas diha sa dakbayan sa Carcar, sanglit iyang giangkon nga ang Carcar usa sa dakong problema sa kapolisan sa tibuok probinsya kun drugas na gani ang hisgutan. (BANATNEWS)