Piniriso sa Lapulapu naka-eskapo

CEBU, Philippines - Usa ka suspek sa pagsuway pagpanulis ug pagpatay ang nakaeskapo sa karsel sa Lapulapu City Police Office human niini gigabas ang rehas sa milabay’ng gabii.

Ang nakaeskapo mao si Joshua Sayson, residente sa barangay Lorega dakbayan sa Sugbu nga nag-atubang og kasong robbery with homicide.

Nahibaw-an nga pipila ka oras gikan nga mieskapo ang suspek nasigpatan pa kining misayaw sa gipahigayong disko sa barangay Pasil sa dakbayan sa Sugbo sumala pa sa nakuhang impormasyon sa kapolisan.

Sa gihimong imbestigasyon, si Sayson niadto lamang milabay’ng Sabado petsa 15 ning bulana sa hapon gitugyan ngadto sa kapolisan sa Lapulapu human madakpi sa mga polis sa Carbon Police Station sa Cebu City Police Office pinaagi sa warrant of arrest.

Sa milabay’ng Domingo sa gabii samtang mitubag sa sugo sa lawas si PO2 Jude Abella ang duty jailer sa detention cell gigabas ni Sayson ang usa ka rehas sa ibabaw nga bahin sa maong bilanggoan gamit ang gabas puthaw.

Human maputol ang ubos nga bahin sa maong rehas gibaliko kini nga igo lang makaagi ang lawas ni Sayson ug daling miikyas sa maong dapit.

Hangtod ning pagsuwat sa balita wala pa masikop pagbalik si Sayson sa kapolisan ug padayon kining nagtagotago samtang giimbestigar karon si Abella gumikan sa maong insidente ug giunsa pagsulod sa maong gabas sa maong bilanggoan.

Si Lapulapu City Police Office Director Sr. Supt. Mariano Natu-el Jr. mihatag og 24 oras ngadto ni Abella pagsikop og balik ni Sayson ug kung mapakyas kini mag-atubang kini og kasong administratiba.

Si Natuel miingon nga gironda unta sa iyang mga sakop ang dapit diin nasigpatan si Sayson naghigda-higda diha sa barangay Pasil human sa disko apan nakamatikod kini ug nakapahilayo.

Nasayran sa Banat News gikan ni SPO2 Federick Eslit sa Crime Against Persons desk sa kapolisan sa Lapulapu nga si Sayson maoy suspetsado sa kasong pagpanulis ug pagpusil patay sa usa ka Engr. Rexel Gonzalez didto sa MEPZ 2 sa Tamiya Basak niadtong Mayo 22, 2009 samtang luwan sa usa ka de-pasaherong multicab atol sa maong pagpanulis.

Si Gonzales usa kini ka engineer sa usa ka kompaniya sa MEPZ 2 nga lumad sa dakbayan sa Talisay. (BANATNEWS)