Ilaga maoy hinungdan sa sunog

CEBU, Philippines - Ang kuryenteng gikitkit sa ilaga maoy gituohan sa kabomberohan nga hinungdan sa sunog nga miugdaw og usa ka balay ug usa ka bodega, ug naangolan og usa ka babaye, didto sa Singson Village sa barangay Tipolo, dakbayan sa Mandaue kagahapon sa alas 12:00 pasado sa kaudtohon.

Si SFO4 Jeolo Sugarol, imbestigador sa kabomberohan sa maong dakbayan miila sa naangol nga si Estela Barasan, 41, kinsa napaso dihang misulay kini sa pagkuha sa ilang mga butang sa balay nilang nasunog.

Si Ernan Barasan, 46, nga bana ni Estela, mao usab ang tag-iya sa bodegang naugdaw sulod sa ilang compound.

Si SF04 Sugarol miingon nga ilang napawong ang kayo sulod lamang sa duha ka minutos pinaagi sa pagtambayayong sa mga sakop sa Barangay Tipolo Fire Brigade, San Miguel Corporation Fire Brigade, Emergency Rescue Unit Foundation (ERUF) ug Accident Control and Emergency Rescue Team (ACERT) ug uban pa.

Si Estella nga maoy tag-iya sa balay nga nasunog mibutyag kang SF04 Sugarol nga didto magsugod ang kayo sa ibabaw sa ilang kisame nga maoy pinuy-anan sa mga ilaga, busa nagtuo siya nga gikitkit sa mga ilaga ang kuryente hinungdan nga mikayo kini.

Gibanabana sa kapolisan nga kaping P500,000 ang katibuk-ang kadaot sa maong sunog. – BANAT NEWS