CEBU, Philippines - Ang Department of Veterinary Medicine & Fisheries (DVMF) inabagan sa Island Rescue Organization (IRO) miawhag sa tanang Sugboanon nga kinahanglang responsable sa pagpabakuna og anti-rabies sa ilang mga iro aron masanta ang pagsaka sa kaso sa rabies.
Si Dr. Alice Utlang nga maoy City Veterinarian, sa samang higayon miawhag sa mga tag-iya og iro sa pagparehistro sa ilang mga iro sa buhatan sa DVMF.
“We want people to become animal behaviorist,” matud pa niini.
Gipangandoy ni Utlang nga unta mahimo nang 100% free rabies ang dakbayan sa Sugbo, sa tawo man o sa hayop.
Midugang si Utlang nga molusad sila og house to house nga kampanya aron masiguro nga ang tanang iro mabakunahan og anti-rabies ug kadtong dili mosanong sa awhag, pamultahon og P2,000.
Si Caroline Mendez, kinsa usa sa mga miyembro sa IRO mibutyag nga giplanohan na nila nga magtukod og Animal Control Center (ACC) nga maoy tanggonganan sa mga libud-suroy nga iro aron nga dili na sila makapaak og mga tawo sa kadalanan.
Unya padasigon ang tanan sa pagbuhi og “asong pinoy” o iro nga Bisaya kay namatikdan nila nga kasagaran sa iro nga gibuhi sa mga tawo karon mao kadtong mga iro nga kaliwat og langyaw.
Sa pagka karon, ang mga barangay Kalunasan ug Lahug mao nalay nagpabiling barangay nga may kaso sa rabies. (BANATNEWS)