CEBU, Philippines - Usa ka kandidato pagka-konsehal sa lungsod sa Barili kinsa wala makalusot sa milabay nga piniliay, kagahapon miangkon sa iyang kaparotan apan gianugonan sa panahong iyang gigugol alang sa politikanhong pangampanya.
Apan bisan pa niini. si Rene Alquizola, usa ka kanhi bantugang magsisibya sa radyo sa gihapon nanghinaot nga hatagan og bili sa mga gidebuenas nga mga politiko nga maoy modumala karon sa lungsod, ang iyang mga plano alang sa dugang kauswagan sa ilang lungsod.
Si Alquizola kinsa mipadayag nga wala niya mahayi ang iyang kapildihan nagkanayon nga pipila sa iyang nalantawan nga labing gikinahanglang proyekto alang sa kauswagan sa Barili mao ang paghimong usa ka regional marketing center sa barangay Mantalongon alang sa mga kahayopan ug sa mga utanon.
Sa pagkakaron nabantog kaayo ang maong barangay nga maoy sentro nga merkado dinhi sa habagatang bahin sa lalawigan sa mga produkto sa kaumahan ilabi na sa mga kahayopan.
Ang Mantalongon maoy tumoranan sa mga kahayopan ug utanon gikan sa mga mag-uuma sa habagatang bahin diin adto usab magtampunsisok ang mga mangomprahay og baboy, kanding, baka, kabaw ug uban pa, nga gikan sa nagkalainlaing lugar lakip na ang taga dakbayan sa Sugbo tungod sa kamatarunganon sa presyo sa ilang mga kahayopan ug mga utanon.
Nahimong paborito ang Mantalongon ilabi na sa mga negosyante og pagkaon busa nakatabang usab kaayo sa mga mag-uuma kansang mga produkto anha halina sa maong lugar.
Apan sumala sa gilaraw ni Alquizola nga dili lamang ang lalawigan sa Cebu maoy makabenepisyo sa maong merkado, kay kun mahimo na kining regional marketing center pinaagi sa pag-abli sa dunggoanan sa barangay Japitan nga usa ka pantalang pangkomersyo, hastang taga Negros Oriental makapahimulos usab niini.
Ang Japitan nag-atubang sa lungsod sa Guihulngan sa Negros Oriental ug sayon kaayong labang-labangon sa mga negosyante og hayop ug utanon.
Gawas niini daghan pa kaayong mga plano si Alquizola nga giplastar niya sa iyang plataporma de gobyerno nga gituohan niyang makatabang kaayo og dako sa taga Barili ilabi na sa mga batan-on sa natad sa edukasyon ug panarbaho ugma damlag. (BANATNEWS)