Ouano ug Sitoy mopalambo sa ika-6 nga distrito

CEBU, Philippines - Ang bag-ong napili nga mga sakop sa hunta probinsyal nga sila si Board Member Elect Thadeo Ouano ug Arliegh Sitoy sa miaging piniliay misaad nga ihatag nila ang kauswagan nga gikinahanglan sa tanang molupyo sa ika-unom nga distrito. 

Si Ouano ug Sitoy kinsa pulos mga banggiitang mayor sa dakbayan sa Mandaue ug lungsod sa Cordova, nagkanayon nga ila nang gihan-ay ang listahan nila sa mga suporta nga ilang ihatag sa mga katawhan sa ilang distrito.

Matud pa nila nga sayon nalang kini kaayo kanila kay hanas ug batid na kaayo sila sa pagdumala og katawhan basi sa kasinatian nila sa dihang nagdumala pa sila isip mayor sa ilang tagsa-tagsa ka lugar.

Ang ika-unom nga distrito gilangkoban sa mga lungsod sa Cordova, ug Consolacion ug dakbayan sa Mandaue human mahimong lone congressional district ang dakbayan sa Lapulapu kansang napiling unang kongresista sa bag-ong haon nga distrito mao si  Congressman Elect Arturo Boy Radaza.

Si Ouano ug Sitoy mibutyag sa Banat News nga daghan kaayong haum nga programa nga ilang giandam karon alang sa kalamboan sa dakbayan sa Mandaue, Consolacion ug Cordova nga naglakip sa pagpalambo sa edukasyon ug turismo.  (BANATNEWS)