Cortes nanawagan sa oposisyon nga ihiklin na ang politika

CEBU, Philippines - Nanawagan ang nasubliang mayor sa dakbayan sa Mandaue nga si Mayor Jonas Cortes sa mga Mandauehanon ug mga kaatbang nga ihiklin na ang politika karong natapos na ang bugnong lugaynon ug tabangan ang dakbayan aron kini mapalambo pa.

Si Jonas mipasalamat usab sa mga supporters sa naangkon niyang kadaugan ug tabangan ang iyang administrasyon alang sa kaayohan sa mga taga Mandaue.

“Mandauehanon have spoken and elected their leaders for the next three years and so we must now start to work as one with the aim to bolster our gains achieved all through the years, in order to prepare the next generations to come for a better Mandaue,” nagkanayon si Cortes.

Gipanglantawan ni Cortes nga ang mosunod nga tulo ka tuig sa iyang administrasyon maangkon na ang kalampusan sa iyang mga proyekto.

Sumala pa niini mas sayon na unya karon ang pagpatuman sa mga proyekto alang sa dakbayan sanglit mayoriya naman sa mga konsehal sa dakbayan naggikan sa iyang pundok.

Sa nakalabay’ng termino ni Cortes, kini mireklamong ang konseho maoy nahimong babag sa katumanan sa iyang mga proyekto gumikan kay sagad kanila atoa sa pikas partido.

Dugang pa ni Cortes nga naglakip sa iyang gitinguhang ipatumang mga proyekto mao ang pagpatukod og dugang kabalayan alang sa mga kabus nga sakop sa 9.2 ka ektaryang luna sa barangay Mantuyong, Tipolo ug barangay Guizo nga gihatag sa kagamhanan ngadto sa mga urban poor sa maong dakbayan.

“Now that election time is over, we’ll work for a better economy. I, too, call on opposition members, to work with me for they may have better ideas than I have on how to improve our city now known as the new capital north of Cebu,” nagkanayon si Cortes. (BANATNEWS)