CEBU, Philippines - Patay ang usa ka drayber ug kritikal ang kapuyo niini dihang nalamba ang ilang gisakyang motorsiklo sa highway sa barangay Legaspi lungsod sa Alegria niadtong Biyernes sa alas 8:15 sa buntag.
Ang namatay pag-abot sa tambalanan mao si Julius Allosad, 35, taga Poblacion lungsod sa Malabuyoc samtang kritikal ang kahimtang tungod sa grabing bun-og ug pangos ang kapuyo niining si Loida Tinamban.
Subay sa gipadangat nga report diha sa operations branch sa Cebu Police Provincial Office (CPPO) ang mga biktima gikan sa ilang barangay ug paingon manuroy paingon sa habagatang bahin.
Apan pag-abot sa maong lugar nadakin-as ang motorsiklong gimaneho ni Allosad ug wala na makabalanse pa hinungdan sa ilang pagkalamba ug maayong pagkabunal sa duha. Nasuta usab sa kapolisan nga ang duha pulos wala magsuot og crash helmets.
Daling gihatod ang duha sa Reinhard Westgen Memorial Hospital apan namatay gyud si Allosada samtang gi-atiman sa mga doctor tungod sa grabeng kadaut sa ulo niini.
Samtang sa paghimo ning balita ang kapuyo niini padayun pa usab nga gi-atiman sa mga doctor. (BANATNEWS)