Comelec sa Carmen nanira

CEBU, Philippines - Gikandadohan na ang buhatan sa Commission on Elections (Comelec) sa lungsod sa Carmen nunot sa hulga sa mga supporters sa naparot nga pagkamayor nga si Mayor Sonia Pua nga sulongon ang maong buhatan.

Si Patricia Sitoy ang election officer sa maong lungsod mipasira sa maong buhatan subay sa kamanduan ni provincial Comelec supervisor Lionel Marco Castillano.

Matud pa ni Sitoy nga igo lamang siyang mituman sa tambag sa iyang labaw nga kandadohan ang buhatan sa Comelec sa maong lungsod aron paglikay sa bahad sa mga supporters ni Pua.

Ang mga supporters miawhag og manual counting sa mga balota niadtong nakalabay’ng eleksyon tungod sa pagduda nganong 6 mil botos lang ang nakuha sa naparot nga mayor.

Ang pagpakandado sa maong buhatan gimando ni Castillano samtang gitun-an pa ang hangyo sa mga supporters ni Pua.

Si Sitoy miangkong wala lang una mopakita sa maong lungsod sa panagana nga atakehon unya ang ilang buhatan nga karon gibantayan na sa mga sakop sa Regional Mobile Group (RMG)-7.

Hinuon niadtong Huwebes mihunong sa ilang lihok protesta ang mga supporters sa mayor ug gitambagan sa kapolisan nga magpabiling kalma ug dili magpadala sa emosyon.

Si Supt. Erson Digal, hepe sa kapolisan sa lalawigan nagkanayon nga iya gihapong ipabilin sa Carmen ang mga sakop sa RMG tungod sa pagdudang subling moulbo ang tensyon kun biyaan kini.

Gawas sa RMG-7 dunay mga sakop sa 78th Infantry Battalion nga miabag pagbantay sa Comelec sa maong lungsod. (BANATNEWS)