CEBU, Philippines - Si Senador Benigno Simeon “Noynoy” Cojuangco Aquino III mao’y labing unang presidente sa nasud nga ulitawo sa kasaysayan sa Pilipinas kun ikaproklamar siyang mananaog isip presidente sa nasud.
Nailhan si Noynoy isip anak sa duha ka bayani nga milaban sa demokrasya nga sila si anhing Senador Benigno “Ninoy” Aquino ug kanhi Presidente Corazon Aquino sa panahon pa sa administrasyon ni kanhi Presidente Ferdinand Marcos.
Giingong mahisama ang kinabuhi ni Noynoy kun ugaling siya gyud ang ma-presidente, kanila ni US President James Buchanan (1857-1861) ug Grover Cleveland.
Si Buchanan mao’y labing una ug nag-inusarang ulitawo nga presidente sa Amerika, samtang si Cleveland maoy labing unang chief executive sa tibuok kalibutan ug labing gamhanan sa maong nasud nga ulitawong presidente ug dihang naminyo didto magpakasal sa White House.
Si Buchanan, mihimo sa iyang pag-umangkon isip iyang First Lady.
Samtang si Cleveland, mipakasal kang Frances Folsom, sa Blue Room didto sa White House.
Sa kaso ni Aquino, mahimong molingkod sa Malacañang nga wala’y First Lady ug mapareho ba siya ni Buchanan o ni Cleveland? (BANATNEWS)