Duha ka tawo gipamusil patay

CEBU, Philippines - Patay diha-diha ang duha ka lalaki samtang usa ang naangol sa managlahing pagpamusil sa dakbayan sa Lapulapu kagahapon sa kaadlawon.

Usa sa mga biktima kinsa hangtod ning pagsuwat sa balita wala pa mailhi sa kapolisan napalgang patay ug may pinusilan sa lawas duol sa barangay hall sa barangay Mactan dakbayan sa Lapulapu mga ala 1:45 kagahapon sa kaadlawon.

Ang maong lalaki gibanabanang nagpangidaron og 20 ngadto sa 25 anyos, nagsul-ob og brown nga pantalon ug nag t-shirt og itom, kasarangan ang pamanit ug gibanabana nga 5’2 ngadto sa 5’5 ang gitas-on niini.

Base sa pasiunang imbestigasyon ni PO1 Maximo Villagonzalo Jr. sa Crime Against Persons Desk nagbarog sa dalan ang biktima sa dihang giduol kini sa wala mailhing tawo ug gipusil sa abaga ug sa tiyan.

Ang biktima gidala pa sa Mactan Doctors Hospital apan patay na kini, nakuha sa kapolisan ang tulo ka kabhang sa kalibre .45 nga bala diha sa crime scene.

Samtang sayo pa niini laing pagpamusil ang nahitabo didto sa sitio Kagudoy sa barangay Basak dakbayan sa Lapulapu diin duha ka tawo ang gipamusil ug usa niini ang nakabsan sa kinabuhi.

Ang biktima mao sila si Albert Mapait Cabalhug, 16, ug Michael Ompad Tampus, 24, mga residente sa maong dapit, si Tampus naigo sa ulo ug namatay.

Samtang ang suspetsado nailhang si Ares Gumban, residente sa maong dapit kinsa giingong kalit miduol sa biktima ug Tampus ug walay daghang estorya kalit namusil.

Si Cabalhug naigo sa tuong bukton, samtang si Tampus naigo sa iyang ulo gamit ang wala pa mailhing armas nga gigamit ni Gumban.

Si Tampus gideklarar sa mirespondeng sakop sa ERUF nga patay na on the spot samtang si Cabalhug gidali kini og dala sa Lapulapu City Hospital. Wala pa matino sa kapolisan ang motibo sa pagpamusil samtang padayon pa ang pagpangita sa suspek. (BANATNEWS)