Tindaha'g computer naugdaw

CEBU, Philippines - Naugdaw ang usa ka baligyaanan og mga computers sa miulbong sunog pasado alas-3 sa hapon kagahapon diha sa eskina sa dalan Molave ug Escario sa barangay Camputhaw.

Gibana-banang mokabat sa P300 mil ang naugdaw nga kabtangan sa BGM Enterprises nga giisa dayon sa 2nd alarm apan nakontrolar paglabay sulod sa 25 minutos.

Usa sa empleyado nga si Glorife Diama mitug-an nga samtang nagkompyuter siya sa sulod kalit lang napawong ang iyang computer ug napalong usab ang ilang aircon.

Natimahoan dayon nila ang bahong sunog ug nag-aso na ang ilang stockroom hinungdan nga iyaha kining gisusi ug nakurat nalang nga dako na kaayo ang kalayo.

Pagbana-bana pa ni Diama mokabat sa dul-an P2 milyones ang danyos sa mga nasunog nga computers.

Matud pa ni SFO2 Roelyn Maratas nga usa ang electrical misuse sa ilang gisusi nga hinungdan sa maong sunog. (BANATNEWS)