COC's 'mosalbar' ni Roxas gi-transmit na

CEBU, Philippines - Gidala na kagahapong adlawa sa assistant regional director sa Commission on Election-7. Atty. Lionel Marco Castillano ngadto sa national canvassing center ang mga Certificate of Canvass dinhi sa Central Visayas.

 Ang COC dinhi sa rehiyon siyete maoy usa sa gipaabot tungod sa pagkasikit sa nagpadayong eskutenyo sa pagka-bise presidente sa nasud diin si Makati Mayor Jejomar Binay maoy naglabaw og dili mominus 700 mil botos batok kang Senador Mar Roxas.

 Sa rehiyon 6 nga maoy balwarte ni Roxas ang COC pa lang sa Antique ang nahidangat sa National Board of Canvassers hinungdan dili pa maisip nga si Binay ang dumadaog sa pagka-bise presidente.

 Ang ubang dapit sa Kabisay-an nga miabot na ang mga COC naglakip kini sa Western Samar ug Southern Leyte diin dunay kinatibuk-ang 254 ka mga COC ang gikatakdang ihatod ngadto sa National Board of Canvassers.

 Kagahapon sa udto miabot na og 84 ang mga nahatod nga COC diin 30 porsiyento sa kinatibuk-an ug 60 na ang kinatibuk-an na-canvass.

Si Roxas sa iyang bahin mibutyag kagahapon nga dili pa ulahi ang tanan hangtod dili mahuman pag-ihap sa mga botos sa tibuok nasud.

Giawhag ni Roxas si Binay sa pagrespeto sa proseso sa eleksiyon pinaagi sa dili una pagpangangkon sa kadaugan.

Ang mga COCs sa rehiyon 6, 7 ug 8 wala pa madawat sa National Board of Canvassers ug kining mga lugara nag-una si Roxas nga nakakuha og taas kaayo nga botos.

“Malinaw sa akin, obligasyon ko sa bawat mamamayang Pilipino na ipagpatuloy ang ating laban hanggang mabilang ang pinakahuling boto. Hangga’t hindi tapos ang bilangan, tuloy na tuloy ang ating laban,” matud ni Roxas.

Sa gipahigayong press conference human sa iyang pagtambong sa Santos nga Misa atol sa pagsaulog sa iyang ka-53 nga adlaw’ng natawhan didto sa LP Headquarters sa Cubao, Quezon City, si Roxas mibutyag nga siya masaligon nga siya ang maproklamar nga mananaog sa pagka-bise presidente.

Sa election returns, ang Aquino-Roxas Bantay Balota mipadayag og 6 milyones ka botos nga wala pa ma-ihap.

“Mataas ang aking kumpyansa at matatag ang aking paniniwala na sa pagtatapos ng bilangan, tayo po ang mangunguna. Tabla ang numero sa lahat ng exit polls at nasa anim na milyong boto pa po ang hindi nabibilang,” dugang pa ni Roxas.

Base sa ARBB, si Roxas nakakuha og 1.5 milyones botos sa tulo ka mga dagkong rehiyon sa Kabisay-an.

Sa Cebu, si Roxas nakakuha og 1, 231, 728 samtang si Binay nakakuha lamang og 477, 342 diin labaw siya og 754, 386, sa Iloilo (walay apil ang Iloilo City) si Roxas nakakuha og 562, 288 samtang sa Binay nakakuha lamang og 136, 022, diin labaw si Roxas og 426, 266 ug sa Negros Occidental si Roxas nakakuha og 706, 164 samtang si Binay aduna lama’y 221, 346 diin labaw og 484, 818 si Roxas.

Siya miawhag sa iyang mga supporters ug sa tibook katawhan sa pagsalig sa ‘democratic system’, magpabilin sa pagkalma ug paghuwat hangtud nga mogawas ang resulta sa eleksyon.

Gikataw-an lamang ni Roxas ang akusasyon sa kampo ni Makati Mayor Jejomar Binay ug ubang mga pasangil sa iyang kaatbang nga aduna siyay special operations aron makadaog. Gani, ang kampo ni Binay ang naghimo sa mga black propaganda sa pagkondisyon sa hunahuna sa katawhan nga siya na ang napiling bise presidente.

Si Roxas mapasalamaton sa malinawon ug hapsay nga eleksyon. (BANATNEWS)