Sanchez, kapitolyo: way angay'ng i-reconcile

CEBU, Philippines - Gisalikway ni Bise Gob. Gregorio Sanchez ang posibilidad nga may mahitabong reconciliation tali kaniya ni Gob. Gwendolyn Garcia karong nahuman na ang election ug silang duha na-reelected sa ilang tagsatagsa ka mga posisyon.

Sumala pa ni Sanchez nga wala silay angayang i-reconcile ngadto kang Garcia sanglit wala man siya mangaway niini.

Matud pang Sanchez nga atol sa election igo ra niyang giyagyag ang mga nakita niyang hiwi ug dili maayong mga binuhatan sa pagdumala sa Kapitolyo.

Kini aron pagpahibawo sa mga Sugbuanon sa gipanghimo sa gobernadora sa iyang unom ka tuig nga pamunuan sa kagamhanan sa lalawigan sa Sugbu.

Si Sanchez nagkanayon nga wala siya’y problema sa ilang paglingkod pagbalik isip presiding officer sa Hunta Probinsiyal kay igo ra siyang motuman sa iyang katungdanan.

Iya hinuong gipalanog ang iyang panawagan sa gobernadora nga ibalik ang iyang awtoridad nga naghatag og gahum sa pagkontrolar sa budget sa Sanguniang Panglungsod ug ang awtoridad sa paghatag og appointment ngadto sa mga contractual ug casual employees.

Samtang sa bahin usab sa gobernador, ang tigpamaba sa Kapitolyo nga si Atty. Rory Jon Sepulveda miingon nga walay angayan i-reconcile ang gobernadora ngadto kang Sanchez.

Ang gusto lamang sa gobernadora nga nahuman na man ang election kinahanglang motuman lamang kini sa ilang tagsatagsa ka mga katungdanan karong nasublian sila sa ilang posisyon.

Wala hinuon mihatag og klarong komentaryo sa hangyo ni Sanchez nga ibalik ang gahum niini sa pagkontrolar sa budget sa Sanguniang Panglungsod ug ang appointing authority sa mga kawani si Sepulveda.   (BANATNEWS)