Radaza wala mahadlok sa petisyon ni Ahong

CEBU, Philippines - Wala mahulga ang kampo ni Mayor-elect Paz Radaza sa election protest nga giduso ngadto sa Commission on Election-Lapulapu sa iyang kaatbang sa politika nga si Junard “Ahong” Chan nga napilde sa milabay’ng bugnong lugaynon.

Matud pa ni Radaza nga katungod sa iyang kaatbang pagduso og protesta.

Nasagmuyo lamang si Radaza gumikan kay atol sa gihimong canvassing sa milabay’ng adlaw ang grupo sa Sukol (kampo ni Ahong) mikumbinser sa katawhan nga misaksi sa pag-ihap sa mga botos ug sa transmittal sa memory cards gikan sa PCOS machines nga adunay tikas nga natigayon atol sa milabay’ng piniliay.

Si Radaza miingon nga ang iyang mga abogado nangandam na usab sa pagtubag sa “urgent motion to suspend proceedings” ug protesta nga giduso sa ilang abogado nga si Atty. Ryan Abrenica.

Base sa protesta, gipadayag sa kampo ni Chan ug Lito Ruiz ang “massive vote buying” sa kampo sa mga Radaza uban sa hiniusang testimoniya sa mga residente sa barangay Canjulao. Apan ang kampo sa mga Radaza naka-obserbar hinuon nga dili lamang makadawat sa kaparutan ang ilang kaatbang, ilabi na nga giharos nila ang kadaogan gikan sa pagka-kongresista, mayor, bise mayor ngadto sa pagka-konsehal.

Ang pagkapili sa magtiayong Radaza usa ka makasaysayanong kalihukan sa maong dakbayan gumikan kay si congressman-elect Arturo Radaza naningkamot nga mahimong highly urbanized city ang dakbayan sa Lapulapu ug ang pagkahimo niining lone district.

Nakita sa mga Radaza nga ang maong dakong kalambuan nga nahimo nila sa Lapulapu gisuklian lamang sa mga Oponganon pinaagi sa pagbotar sa tanan nilang kandidato.

Samtang si Paz Radaza misaad kini nga dugang pa unyang mga kalambuan ang ilang ihatag   sa dakbayan sa Lapulapu sa ilang pagdumala unya niini. – BANAT NEWS