Binandol marijuana nasakmit

CEBU, Philippines - Duha ka lalaki nasakmitan og binandol nga marijuana ug mga pinaugang dahon niini sa miaging hapon sa dalan Leyson, Talamban.

Ang nasikop mao sila si Leopoldo Lim Diaz, 38, molupyo sa dalan Magallanes, siyudad sa Tacloban ug Friddie Surban Orio, molupyo sa Kadahuran, Talamban.

Sa pasiunang imbestigasyon sa kapolisan nasayran nga mipahigayon og checkpoint ang mga sakop sa Talamban Police Station sa nahisgutang lugar pinanguluhan ni Insp. Elisandro Quijano sa dihang silang Diaz ug Orio nasigpatan nga adunay kadudahang lihok.

Gisita kini sa kapolisan ug girikisa ug nakuhaan og usa ka bandol nga marijuana nga adunay gibug-aton nga usa ka kilo ug 3/4 ka kilong pinaugang dahon niini.

Tungod niini, daling gisikop ang duha tungod sa kalapasan sa paghupot og narcotics ug kasamtangan karon silang gitanggong sa Talamban Police Station samtang nagpaabot sa kaso ipasaka batok nila. - BANAT NEWS