CEBU, Philippines - Mga naparot nga kandidato sa dakbayan sa Talisay nanghinaot nga mapalambo pa ang siyudad ug mapatunhay ang kahapsay ug kalinaw sa mga napiling mamunoan karon.
Si kanhi Bise Mayor Aberdovey Belleza nga nahinabi sa Banat News kagahapon nagkanayon nga nanghinaot siya sa mga napiling opisyal karon nga hatagan pa og kalamboan ang siyudad alang sa kaayohan sa mga Talisaynon.
Giawhag usab niya ang mga nakadaog sa dili paggukod sa mga Talisaynon nga wala mosuporta ug mobotar kanila.
Matud ni Belleza nga ang midaog nga mga kandidato “dili lang sila opisyal sa mga mibotar kanila, opisyal sila sa tanang Talisaynon.”
Ang kanhi bise mayor miawhag sa tanang mga Talisaynon nga mosuporta sa mga napiling lider sa siyudad.
Si Belleza mapasalamaton sa tanang mga Talisaynon kinsa misuporta kaniya sa milabay’ng eleksiyon.
Kahinumduman nga niadtong eleksiyon sa tuig 2007 si Belleza kinsa midagan isip bise mayor sa Talisay napildi ni kanhi Bise Mayor Lani Abarquez.
Niining tuiga, si Belleza subling nagpapili isip bise mayor sa Talisay apan naparot kini sa iyang kaatbang nga si incumbent Bice Mayor Alan Bucao.
Sa laing bahin, ang naparot nga kandidato pagka-mayor sa Talisay nga si kanhi Bokal Raul Bacaltos nanghinaot nga mausab na ang sistema sa kagamhanan ug hatagan og pagtagad ang mga problema nga giatubang sa siyudad.
Usa sa gipanghinaot ni Bacaltos nga dili na pasagdan ni Mayor Socrates Fernandez ang iyang sinagop nga magpabadlong ug ipasulod na kini sa rehabilitation center aron dili na bation og kabalaka ang mga Talisaynon ug dili magpanagana ang mga investors nga mosulod sa siyudad.
Gipasabot niini nga usa sa tan-awon sa mga investors una kini mobubo og puhonan sa usa ka lugar ang kabahin sa kahapsay ug kalinaw sa Talisay.
Dili ikalimod nga ang sinagop sa mayor nga si Joavan kanunay kining nalambigit sa mga isyu tungod sa iyang kabadlongon.
Si Bacaltos kinsa igsuon sa kanhi mayor sa siyudad Deliah Bacaltos-Tiu napilde ni Fernandez. - BANAT NEWS