Traysikol nalimbuwad 1 patay, lima 'angol

CEBU, Philippines - Usa ka traysikol ang nalimbuwad ug mikalas sa kinabuhi sa usa ka pasahero niini ug miangol sa lima kagahapon pasado alas 12:30 sa udto sa barangay Lindogon lungsod sa Sibonga.

Ang mga biktima giilang sila si Carmelita We, 56, molupyo sa Zamboanga City, si We namatay sa maong aksidente, Josephine del Soccoro, 54, igsuon ni Carmelita, ug residente sa Tunghaan, Minglanilla, Ely Rose del Socorro, 7, anak ni Josephine, Jessie Ouano, 47, taga Banilad dakbayan sa Mandaue, ug Myrna Andales, 52, residente sa Maguikay, Mandaue City.

Ang traysikol gimaneho ni Juanito Magallon, 47, molupyo sa sitio Ilihan, Simala gikan pa sa Marian Monks nga simbahan sa Sibonga.

Sa pakighinabi sa Banat News ni PO3 Antonio Andales samtang nagpadulong kini sa Sibonga Proper nawad-an kini og break hinungdan mitulimbang.

Ang mga biktima nakaangkon og mga samad sa nagkadaiyang parte sa ilang lawas ug gidala sa Deiparine Medical Clinic ug gibalhin sa mga tambalanan sa dakbayan sa Sugbu.  - BANAT NEWS